Monday, December 1, 2014

अदालतया बारे छुं खँ

सम्पादकजु,
दकलय् न्हापां जि हनेबहम्ह राजा शाक्यजुयात जितः थःगु सफु उलेज्याय् सःता दिउगुलिं सुभाय् । साक्क ज्यःनां नं यायेखन, उकिया निंतिं नं सुभाय् ।

यक्व न्हापांनिसें अमृता प्रितमयागु उपन्यास नेवाःभासं भाय् हिलाः कथहँ विश्वभूमिइ पिदन धइगु न्यनातयागु, जिं थम्हं ला ब्वनाथें मच्वं । आः थ्व सफू हे जुयाः पिहाँ वःगु धइगु झी सकसिया निंतिं लय्ताःया खँ खः । नेपालभाषा ख्यलय् मेमेगु भाय्या बाबांलाःगु साहित्य झीगु भासय् भाय् हिलेगु ज्या उलि मजुयाच्वंथाय् थ्व छगू च्वछाय्बहगु ज्या धकाः मधाइपिं दइमखु । थज्याःगु ज्याया निंतिं भाय् हिलादिउम्ह, सम्पादनयानादिउम्ह व पिथना गुथियात आपालं भिंतुना, सुभाय् ।

थ्व फुक्क खँयात उलि हे सम्मान यासें मतिइ लूगु छता खँ थन कनेगु धृष्टता यानाच्वना । थ्व सफू न्ह्याम्हस्यां न्ह्याक्व भाय् हिउसां थुकिया च्वमि धइम्ह अमृता प्रितम हे खः, थुकिइ सुयातं दुविधा मदयेमाः, दयेकीथें नं मच्वं । अथे खःसा थुकिया द्यवलय् छाय् च्वमिया नां उलि चिग्वःगु आखलं वल अले भाय् ह्यूम्ह धकाः व सम्पादन धकाः छाय् ततःग्वःगु आखलं वल धइगु जिगु जिज्ञासा खः । वथेंतुं लिद्यवलय् नं भाय् हिलादिउम्हस्या म्हसिका छगू पेज वयाच्वन तर च्वमिया म्हसिका गनं मखं । अपाय्जि भाय् हिलेत योग्य जूगु सफू च्वयादीम्ह च्वमिया बःचा हाकःगु जीवनी, परिचय व कृतिधलः नं दूगु सा बांलाइगु ताः । अथे मखु सा जि अज्ञानीयात माफ यानादिसँ ।

धयाच्वनेम्वाः अमृताया जीवन स्वयम् हे नं छगू उपन्यास खः । झीसं धूस्वां धयाच्वना, मेपिन्सं वयात प्रितम सिंह, साहिर लुधयानवी व इमरोजयाकथं नं म्हसिउ । थ्व खँ थ्व हे सफूया कुंचाय् गनं न्ह्यंगु खःसा ब्वमिपिन्सं अदातल झं बांलाक थुइगु जुइ । भाय्हिलादिउम्ह व सम्पादकया बिचाः ला ब्वने खन, तर च्वमि स्वयम्या थ्व सफू प्रति छुं धायेगु मदु ला? व नं जिपिं ब्वमिपिनिगु लागि महत्वपूर्ण ताः ।

जिं नं गबलें गबलें सःथें मसःथें भाय् हिला । थथे यायेबलय् थःगु नां खने हे मदुसा जिउ धयाथें च्वनीगु, थ्व ला द्वंगु स्यंगुया जिम्मेवारी कायेगु जक थें च्वं जितः । च्वमि न्ह्याक्व हे क्वह्यंम्ह, क्वजात, चीमि, ख्वाः बांमलाःम्ह वा मदयेधुंकूम्ह जूसां च्वमि हे जुइ । सुद्र्यः हे जुइ, पाल्हाःतिं तपुनां फइमखु । अदालत अमृता प्रितमं च्वःगुलिं हे अदालत जूगु खः उकियात अंग्रेजी, जापानी, जुलु वा एस्पेरान्तो भासं भाय् हिउसां व अदालत हे जुइ, उकिया च्वमि अमृता प्रितम हे जुइ । थज्याःथाय् भाय्हिउम्ह व सम्पादकया भूमिका म्हो व अप्वःया हिसाब जुइथें मताः । छम्ह च्वमिया सिर्जनाया मू मेम्ह च्वमिं मथूसा सुनां थुइ ? छु स्वयम् हनेबहम्ह बाखं च्वमि राजा शाक्यजुया गुगुं बाखं सफू थःगु नां चिग्वः आखः अले भाय् हिउम्ह वव सम्पादकया नां तग्वः आखः तयाः पिदंसा स्वीकार्य जुइला? जितः थ्व सफू गनं च्वनः च्वमि मय्जु अमृता प्रितमजुं स्वयाच्वन धाःसा वय्कः लय्ताइ मताः । अदालतयात नेवाः सफू दयेकादीपिं दक्वसित हानं छक्व भिंतुना ।

राजेन मानन्धर
गुसिंगाः, यल

Published on Sandhya Times on 2014 12 01



No comments: