Monday, August 7, 2000

20000806बुंगद्यवं छ्वयाहःगु पौ




- रा. मानन्धर

साप हे यःपिं स्वनिगःया किजाकेहेँपिं,

सकल प्राणीया उद्धार जुइमा । स्वस्वं स्वनिगः नं थौं गनं गन थ्यंने धुंकल – साप हे बांलाः । थ्व काय् मियाः च्यः न्यायेगु नीतिं हे स्वनिगः थपायकसं मसां थें झः झः धाःगु थें जिं तायेकाच्वना । तःदँ दयेधुंकल छिकपिनिगु नामय् पौ च्वयेगु इच्छा यानाच्वनागु तर छु याये किलं नःगु जाकि, नवःगु नीलः व बासि प्यारा ननं न्ह्याब्लें प्वाः स्याः । बिचाः याइपिनि द्यः तंगु रिपोर्ट जक बिउवँवं लिमलाः, अले झारे याइम्ह गुरुजुया नं न्हिं न्हिं बाः काःवनेमाः, उकिं म्ह सुख मदयाः पौ तकं च्वये मलानाच्वन ।

छिकपिन्सं सि हे सिउ, थुगुसीया जिगु जात्रा गज्याःगु जात्रा जुल धकाः । जिगु नुगलय् स्यात जुइ, जि तम्वल जुइ धकाः भ्याः भचा हे चिउताः तयादीम्वाः । छिकपिन्सं जितः व लुँ चुइकाहइगु खुसिइ वायेयंकामदिउ – थ्व हे लाख का ।

जिं सिउ, थौंकन्हय् न्हापा थें मखयेधुंकल । न्हापा द्यःतय् निंतिं मनूत म्वाइ, आः मनूतय् निंतिं द्यःत धस्वानाच्वनेमाः । थौंकन्हयया मनूत साप लिमलाः । गुलिस्यां छेँ बुँ मियाः जापानय् जा थूवनेमाः, गुलिस्यां कलाः काय् ख्वयेकाः भारतय् भारा सिउवनेमाः । थ्व सुकूगंगु स्वनिगलं सुयातं छुं नकेमफुत । उकिं थः जिउ थम्हं स्वये हे माल ।

थथे हे जुयाः थुगुसिइ जिं यक्व न्हून्हूगु खँत नं स्वये खन – जिगु न्ह्यःने गथांमुगःचित छ्वालि क्यंगु नं खन, गुलां भोटो क्यंगु नं खन । म्वाना जक च्वंसा छु छु स्वये दइतिनि धाइगु धात्थें खः खनी । आः ख्वपयतय्सं व यमितयसं जितः सालायंकूगु स्वयेत नं तःदँ पिइमालीमखुत जुइ ।

भुलचुक धइगु न्ह्याम्हेस्यां जुइ । जिगु नं जुल जुइ । सिइकं चायेकं ला अथे हेपाः मजुया थें च्वं । शिवपुरीयात सेनापुरी दयेकूगुलिं सिमा मन्त, वा वयेके मफुत । छेँय् छेँय् डीपबोरिङ्ग यायेवं बागमति नं बागःचा जुल । यानां जिक्व ला वा वयेकागु हे खः । वा हे वयेकूसां तुकुचा खुसिया सिथय् नगरपालिकां दयेकेबियातःगु ग्वाः पसः दुन धकाः छिकपिं हे रिपोर्ट याः झाइ । आः जिं छु यायेगु?

छु धाये, द्यःया सर्बय् नइम्ह गुथि संस्थानं नं याःगु हे खः । न्हिं न्हिं सुथय् ९ बजे जुलकि तःबहालय् हाजिर याः वनेमाः उमि । धर्म धलय् कर्म कपालय् जूगुलिं ज्या याइपिं बाराहीत व यँवाःतय् नं थौंकन्हय् खः दयेके धालकि छाःकिलं ल्हातिइ छाइगु । दोष ठेक्कापट्टायागु नं मखु – सारा देश हे ठेक्कां चले जू, जिगु खः दयेकेगु चले मजुइ धइगु खँ मखु । आः ला जिगु जात्रा वलकि जि म्हय् जिउ मदु – ग्वःकः ग्वःकः द्यवं हे फयाकाःथें च्वंक बचय् जुइ धुन – न्ह्याबलें जुइ ला ?

नुगलय् च्वंम्ह द्यः लुमंकाः धयादिसा – जि थम्हं वये धकाः वयागु मखु, छिकपिन्सं हे वा वयेकेमाल धकाः आसामंनिसें छक्का पंजा यानाः हयादिल । आः ट्यांकरं लः हयाबिल धायेवं जितः लिथु हःम्ह भाःतं थें हेबायचबाय् यानादी मजिउगु खः । जितः थौं तक नं जिमि मां आसामया जनता व अनया उग्रवादीत म्हगसय् वयाः सःताच्वनी । छिकपिन्त जि म्वाःल सा म्वाःल धयादिसँ, अन जितः वा धयाच्वंपिं दनि । लँ खर्च जक बियादिसँ, जि थः हे वने । तर छिकपिन्सं जितः छ्वयादीमखु धइगु जिं बांलाक सिउ । जिगु थ्व ख्वाःपाःचा ब्वयाः छिकपिन्सं दच्छिया गुलि कमाइ यानादी धइगु लेखा समितिं मस्वःसां जिं स्वयाच्वनागु दु । धन्दा कयादीमते, छिकपिनिगु फ्वनाः नयेगु धौभ्यगःचा जुयाः जि थन हे च्वनाच्वने ।

अथेसां जिके छगू उपाय दु । नगरपालिकायात धयाः दँयदसं जिगु जात्रा न्यायेकेत छगू टेण्डर पिकयादिसँ । द्यः हयेग्, खः दयेकेगु, देय् चाःहीकेगु , जावलाभ्वय् न्यायेकेगु, भोटो क्यनेगु व लित यंकेगु ब्याक्कं ज्या व कम्पनीयात बियादिसँ । अले जात्रा ज्वःछि जूगु कमाइ बुंगया पान्जुत, बाराहीत, यँवाःत, क्रेन, बुलडोजर थुवाःतयत व नगरपालिकायात भागं थछि इनादिसँ । बरु थ्व टेण्डर नेवाःतयत मलाकुसे खयत बाय् मस्र्यातयत लाकूसा बांलाइ – छाय् धाःसा उमिगु ज्या क्वातु, इलय् नं सिधः व सत्ते सत्ते, जितः छुं हे म्वाः । गंगु प्यारा व प्लाष्टिकया स्वां दुसा गाः । व स्वयाः ला नखुइ थ्यने न्ह्यः जिगु म्ह जक कुचा मजूसां गाः ।

थौंयात थुलि हे, मेगु लिपा ।

बुंग द्यः ।
Published in Sandhya Times on 2000 08 06. Later in www.newanolinenews.com
- See more at: http://www.newaonlinenews.com/%E0%A4%AC%E0%A5%81%E0%A4%82%E0%A4%97%E0%A4%A6%E0%A5%8D%E0%A4%AF%E0%A4%B5%E0%A4%82-%E0%A4%9B%E0%A5%8D%E0%A4%B5%E0%A4%AF%E0%A4%BE%E0%A4%B9%E0%A4%83%E0%A4%97%E0%A5%81-%E0%A4%AA%E0%A5%8C#sthash.PcyMpmvA.dpuf

न्हू सतकयात हानं भीमफेदी थें मृत शहर यायेगु ला?

  राजेन मानन्धर निद्वःदँ पुलांगु सभ्यताया इतिहास दूगु थ्व स्वनिगःया दकलय् तःधंगु बजाः लागा थौंया न्हूसतक वा न्यूरोड खः । थी थी राजनीतिक परिव...