20150402 मिस्तय्त एसिड छ्वाकाः जातीय विभेद तंके धाइपिं

संसारया दक्व मिसा अधिकारकर्मी मिस्त नारी दिवसया तयारी यानाच्वंबलय् येँया केन्द्रविन्दु धयाच्वनागु बसन्तपू लिउने फागुण १० गते १६दँ दुम्ह संगीता मगर लिसें मेम्ह निम्ह सीमा बस्नेत, हिमु मुखर्जी नां, दुपिं नच्चापिं मिस्तय्त एसिड थज्याःगु अत्यन्त ज्वलनशिल पदार्थं छ्वाकाः फरार जुल २२दँ दुम्ह जीवन बिक । थ्व घटनायात थी थी मनूतय्सं थी थी कथं ब्याख्या यायेगु कुतः यानावयाच्वंगु दु । विशेष यानाः थौंकन्हय् अःपुक बिचार कायेजिउगु व बिचाः प्वंकेजिउगु न्यूज पोर्टल व सामाजिक संजालतय्गु कारणं नं थ्व खँ यक्वस्यां सिल अले थःत लगेजूगु खँ प्वंके नं खन ।

घटना जुइवं छन्हुनिन्हु मिसा अधिकारकर्मीत वसन्तपुरय् मुन, जुलुस जुल । समाचार नं वल, थःथःम्हस्यां उकिया फोटो फेसबुकय् तल, यक्वस्यां सिल । छम्ह नायिका उमित नापलाः नं वन । छुं जुइगु चलन हे मदुथाय् छुं जुल खनी धकाः मनूत धुक्क जुल । थपाय्च्वः जनदबाव वयेवं ला याकनं अपराधी माली, वयात सजाय बिइ धकाः जनता आशाबादी नं जुल ।

तर राजधानीइ न्ह्याबलें संविधान मदयेकू, लः मवः मत मवइ, लँ स्यं, धः मदु, इत्यादी समस्याय् जक तक्यनाच्वनेमाःबलय् थज्याःगु संवेदनशिल विषययात पत्रपत्रिकां व सामाजिक संजालं नं उकि क्वातुक्क ल्ह्वने मफुत । एसिडं पुत कि छु जुइ धकाः कल्पना यायेमफयाः नं अथे जूगु जुइफु । वा गुलिस्यां थुकियात मगरतय्गु समस्या तायेकल जुइ, वा गुलिस्यां विश्वकर्मातय्गु समस्या तायेकल जुइ । झीसं शायद थुकियात थ्व झीगु मखु बालंच्वनीपिनिगु खँ धकाः वास्ता यायेमफुगु नं जुइफु ।

अस्पतालय् पिडित संगीता मगर वाथावाथा कनाच्वन । जव वयागु प्रधानमन्त्रीयात पौ धकाः संचार माध्यमय् वल, अले मनूतय्त भचा थिल वयागु वेदनां । तर अज्याःगु जघन्य अपराधया दोषीयात मालेगु ज्याय् पुलिसं छुं यात का धायेबहगु ज्या यानाक्यने मफुत । ज्या बालं च्वंपिनिगु जुइ धकाः शंका ला यात तर झीथाय् न बालंच्वंपिनिगु रिकर्ड कायेगु चलन न बालं तइपिनि दु, न स्थानीय प्रहरीया हे दु ।

लछि लिपा अकस्मात दोषी सिक्किमय् ज्वन याकनं सार्वजनिक याइ धकाः अनलाईन पत्रिकां तयाबिल (लिपा अज्याःगु न्यूजपोर्टलं सिक्किमया खँ लिकानाछ्वल, उकियात कयाः समाचार च्वःपिं नेवाःन्यूज व सन्ध्याटाइम्सय् जक ल्यनाच्वन), मनूत छकलं अजूचाल । नेपाःया प्रहरी भारतया सिक्किमय् च्वंम्ह अभियुक्तयात गथेयानाः ज्वनाहल जुइ धइगु मतिइ मवंगु मखु ।

न्ह्यकुन्हु टोखां ज्वनागु धकाः चैत्र ८ गते सार्वजनिक याःम्ह मनू संगीता बालं च्वनीगु छेँय् हे बालं च्वनीम्ह त्वालय् दक्वस्यां खंम्ह हे जुयाच्वन । उकिसं मुसुमुसु न्हिलाच्वंम्ह मनूयात बेहोश जुल धकाः छकलं ब्वाकल । खँ फछ्या ।

चैत्र ६ गते प्रकाशित प्रविण ढकालया समाचार कथं वयात ज्वनेवं दकलय् न्हापां वं ब्यूटि बिगार्न एसिड आक्रमण यानागु धकाः धाल । थ्व लिसे वयागु मेगु खँ प्रेमलिसे स्वाकल ।  वयां लिपा प्रेम प्रतिशोधमा बदलिएपछि एसिड आक्रमण http://setopati.com/samaj/25815/ धकाः नं खँ वल । जबकि मिसां नयाँ पत्रिकायात बिउगु अन्तरवार्ताय् उमि मतिनाया खँ मजूगु व मिजनं वयात गुरुंग थरयाम्ह मिजंलिसे पासा दयेकेत दबाव जक बियाच्वंगु धकाः खः धकाः धयातःगु दु । इमेज च्यानलय् वःगु अन्तर्वार्ताय् मांम्हस्यां नं अथे हे धाल https://www.youtube.com/watch?v=jdroC6Xie5A । थन नं प्रेमयात दोष ला ?

थ्व गुगुं आवेशय् वयाः याःगु आक्रमण नं मखु । थ्व हे याये धकाः वं लां लां एशिड हयाः योजना दयेकाः याःगु खः । अले पुलिसं धाःकथं पक्राउ जूसा जुइबिउ धकाः हे एसिडं छ्वाकूगु खः ।

एसिडयात अःपूगु हतियारया रुपय् छ्यलेगु प्रचलन नेपालय् थ्व न्हापांगुखुसिइ जूगु मखु । अझ विशेष यानाः बंगलादेश, भारत व पाकिस्तान थज्याःगु दक्षिण एशियाय् ला थः धइथे मन्त कि, विशेष यानाः थः नाप इहिपा यायेमखु धाइपिं, प्रेम प्रस्ताव अस्वीकार याइपिं व यौन स्वापु तयेमखु धाइपिं मिस्ततय्त एसिड आक्रमण यानाः शारीरिक सुन्दरता स्यंका बिइगु धइगु मिजंतय्स थःगु अधिकार थें तायेकी । थनया समाजं मिजंतय्त प्रेम प्रस्ताव धइगु मिसा व मिजं निम्हस्यागु मंकाः भावना व स्वीकारोक्ति खः धकाः तकं ल्वःमकी । उमि बिचाः कथं मिस्तय् यःमयः धइगु दयेमजिउ अले मयःम्ह मिजंयात मयः धायेगु धइगु मिसाया अपराध खः, उकिं मिजंत उमित सजाय बिइत प्रेरित जुइ । थुकथं यानाः हे बंगलादेशय् जक हे दछिया १००० स्वयाः अप्वः मिस्तय्त एसिड कयेकाः उमित शारीरिक रुपं क्षतविक्षत यानाबिइ ।

शिरिन जुवालीया अनुभव

https://www.youtube.com/watch?v=_N-pkM_6mWQ&feature=share छगू न्यनेवं हे सिइ थ्व गुलि ग्यानापुगु अपराध खः धकाः । छम्हसित हू वःगु भरय् थथे मेम्हसिया जीवन बरबाद यायेगु ज्या गुबलें गुगु नं बहानाय् क्षम्य जुइमखु ।

नेपालय् नं जूगु व हे खः । छम्ह मिजनं थम्हं ट्युशन ब्वंकाम्ह मिसायात ययेकी (यदि अथे खःसा), मिसां छुं नं कारणं मयः धायेवं वयात बदला कायेमास्ति वइ, वयागु सुन्दरता स्यंकेमास्ति वइ । छु थ्व प्रेम खः ला? न्ह्यसः दनी । प्रेम वा मेगु छुं नं नां बियाः मिसाया शरीर व सुन्दरतायात थःगु यानाकायेगु लालसा अले व अभिष्ट पुरा मजुइवं उकियात हे स्यंकेगु दानवीय प्रवृतियात प्रेमया नां तक नं बिइगु पाय्छि मजू ।

चैत्र ९ गते सेतोपाटी डटकमय् गुणराज लुइँटेलं जातपातको एसिडले जन्माएका जीवन नांगु समाचार विशलेषण (http://setopati.com/samaj/25959/ ) च्वयेवं थ्व घटनाया विश्लेषणं मेगु रुप काल । वयां लिपा कान्तिपुरय् नं मधु शाह नामं मेगु लेख पिदन । हानं लिपा मेम्ह  पत्रकारं नं सजाय पियाच्वंम्ह जीवन बिकया अन्तरवार्ताय् http://www.himalayakhabar.com/detail/56143.html थ्व हे खँय् जोड बिल । इन्दिरा प्रसाइनं नं इमेज खबरय् अथे हे च्वल http://imagekhabar.com/blog/detail/176 । खबर डबलीइ विनोद प्रसाद अधिकारी संगीतायात थुकिया कारण छ नं खः धकाः तकं च्वल http://www.khabardabali.com/2015/04/10768/।

जातया खँ वइ । गुम्ह मनू मिसा छम्हसित फसेयायेत मखुगु खँ ल्हानाः थःगु जात खड्का धकाः धयातइ, वयात जातीय विभेदया विरुद्ध हतियार ल्ह्वंगु धायेगु छतिं पाय्छि मजू । खः, जातीय विभेद नेपाःया छगू अभिशाप खः । थुकिया निंतिं थःत क्वजात धायेकेमालाच्वंपिं मनूत ल्वानाच्वंगु नं बासः दँ दयेधुंकल, ल्वायेसिधःगु मदुनि । उकिया हे नामय् अन्तर्राष्ट्रिय ख्यलं अरबौं दां वयेधुंकल झं मगाःनि, थन दलित मुक्तिया नामय् दर्जनौ एनजिओत ज्या यानाच्वंगु दु, क्वचाःगु मदुनि । अले छम्ह थःत यःम्ह धयातःम्ह मिसां मयः धयाबिइवं वयागु ख्वालय् एसिड छ्वाकाः जातीय विभेद तनीगु ला ? थ्व स्वया हास्यास्पद तर्क संसारय् मेगु मदयेमाः, विशेष याना: थुकियात जब वरिष्ठ पत्रकारतय्सं तकं पत्याः यानाबिइ, पत्रकारितायात हे थुकिं लज्जाबोध याकी ।

थथे मू मुद्दायात संचारमाध्यमं ब्यक्वय्केवं थःगु ज्यानया सुरक्षा मजुयाच्वन धकाः हालाच्वंपिं मिस्तय्त छगू त्रास बिउगु दु । न्यनाजक तयागु झीसं, मुस्लिम देशय् जक मिसायात बलात्कार जुइ, अबलय् अनया सरकारं व हे मिसायात सजाय बिइ हँ मिजंतय्त उत्तेजित यात धकाः । थौंया २१औं शताब्दीइ नं जब छम्ह नच्चाम्ह मिसायात मखंक मचायेक योजनाबद्ध ढंगं एसिड छ्वाकाः मिजंम्ह बिसिउँ वनी, अबलय् नं व मिजंया बचाउ यायेकथंया लेख छम्ह जिम्मेवार व वरिष्ठ धयातःम्ह पत्रकारं च्वयाः संसारयात बिइ । थ्व पाय्छि जुइफइमखु ।

छम्ह स्नातक ब्वनातःम्ह मनुखं भारतीय टिभीया अज्याःगु ज्याझ्वः स्वइ गुगु कि विशेषयानाः गथे यानाः अपराध मजुइकेमाः धकाः शिक्षा बिइत दयेकातःगु खः, अले उगु हे ज्याझ्वः पाखें थथे यायेगु सयेका धायेगु खःसा मनूयात भिंगु यायेत स्यनीगु दक्व ज्याखं मनूतय्सं मभिंगु जक यायेगु सयेकीगु खःसा मनूतय्त स्यनेगु गथेयानाः धकाः हे नं हानं बिचाः यायेमाःगु अवस्था वःगु दु । मेगु हास्यास्पद खँ छु नं खः धाःसा व स्नातक ब्वनातःम्ह मनुखं एसिड धइगु पदार्थ प्लास्टिकया बोटलय् तयेमजिउ धकाः तकं मसिउ ।

अपराधीया जात दइमखु । जब मनुखं अपराध याइ व अपराधी जक जुइ, उकिया कानून बमोजिम सजाय जुइमाः । हरेक अपराधीं कारण दयाः हे अपराध याइ, तर उगु कारण क्यनाः अपराधीप्रति सहानुभूति क्यनेगु, कानूनी निर्णययात प्रभावित यायेगु मेम्ह अपराधीयात जन्मे यायेगु खः । कानून मगाःसा उचित कानून दयेकाःसां यक्व स्वया यक्व सजाय बियाः देशय् कानूनया राज दु धकाः जनतायात थुइका बिइगु व उमित देसय् नागरिकत दक्व कानूनया संरक्षणय् दु धकाः विश्वस्त यायेगु दायित्व राज्ययागु खः।

- See more at: http://www.newaonlinenews.com/%E0%A4%AE%E0%A4%BF%E0%A4%B8%E0%A5%8D%E0%A4%A4%E0%A4%AF%E0%A5%8D%E0%A4%A4-%E0%A4%8F%E0%A4%B8%E0%A4%BF%E0%A4%A1-%E0%A4%9B%E0%A5%8D%E0%A4%B5%E0%A4%BE%E0%A4%95%E0%A4%BE%E0%A4%83-%E0%A4%9C%E0%A4%BE%E0%A4%A4%E0%A5%80%E0%A4%AF-%E0%A4%B5%E0%A4%BF%E0%A4%AD%E0%A5%87%E0%A4%A6-%E0%A4%A4%E0%A4%82%E0%A4%95%E0%A5%87-%E0%A4%A7%E0%A4%BE%E0%A4%87%E0%A4%AA%E0%A4%BF%E0%A4%82#sthash.f10QtcK8.dpuf

Published in www.newaonlinenews.com on 201504 02 "Those who intend to end caste discrimination by throwing acid on girls"