Friday, July 1, 2016

20160701 पेरिसय् पलाः

नियात्रा

न्हय्घौतक ब्वयाः न्हिनय् २.४०य् जिमिगु जहाजया घःचालं फ्रान्सया भुमिइ थिल । न्हापा ला गथे गथे जक जुयाच्वंगु, जहाज दिइवं ला जि दुने दुनें ग्याना वल । आः छु जुइ धैथें, दुकाइ ला मकाइ ला धयाथें । नेपाली जुइगु नं गज्याःगु, भिसा ज्वनाः वयाः नं आत्मविश्वास मदयेक विदेशी भुमिइ पलाः तयेमाःगु । बिस्तारं पिहाँ वया । जितः खनेवं हाकुम्ह पुलिसनीनं जिके पासपोर्ट स्वये धाल, पेरिसय् च्वनेगु खःला धकाः न्यन । चिकीचाहकलं धया, “मखु...लछि जक” अलमलगु जिगु म्हुतुं लिसः वल । जिं धायेत्यनागु छु खः व हे जिं मसिल । वं न्यंगु छु खः जिं लिसः बियागु छु खः — जिगु म्हुतुं पिहां वःगु खँग्वलं वयागु न्ह्यसःया लिसः ज्यात लाकि मज्यात मसिउ । भिसाय् उखें थुखें स्वा अल ल्हातिं हुँ धकाः लित बिल ।

ग्याग्यां पासपोर्ट धकाः च्वयातःथाय् लाइन च्वना । वं नं पुतूपुइकाः पासर्पोटय् स्वल, नापसं च्वम्हसित नं क्यन । नेपाल धैगु थाय् नं दु ला थ्व संसारय् धकाः न्यंगु ला, अले ल्हातिं च्वयातःगु पासपोर्ट नं चलेयाःनि ला मनूतय्सं धकाः खँ ल्हाःगु नं जुइफु । जि उमिगु लागि मेगु ग्रहया प्राणी वा जि मेगु ग्रहलय् वनाम्ह एलिएन पर्यटक । जि थज्याःपिं मनूत उमिसं थःगु जागिरया दौरानय् ग्वःम्ह खन जुइ ? 

दन्न मत च्याःसां जिगु लगि ला थ्व लोडसेडिङ, तान्हिनय् नं थ्व ला जिगु लागि सब्बुचा । गय् यानाः पिहाँ वनेगु, गन वनधायेवं गन थ्यनी ? पिने जितः कायेत सुं वयाच्वंगु दुला मदुला? जि ला सुनां नं काः मवःसा लिहाँ हे वनाछ्वयेमाली ला धयाथे च्वन । झ्वातां दनाच्वनंगु पिने वनेगु ध्वाखां जितः भुतं ख्यायेथें ख्यानाच्वन । फुसा वा धकाः धयाच्वन । सेलमरि थें चाःचाः हीकातःगु एअरपोर्टया टर्मिनल भवनय् चाःचाःहिलाः लगेज काःवेनगु थाय् मालाच्वना ।

जितः एअरपोर्टय् कायेत इसाबेल लेम्बार्टं वये धाःगु ला खः तर आः व मय्जु थ्यन ला मथ्यनला ? जितः कायेत सुं वइला मइला धैगुु पीर जुल । वयेत ला वये धाल तर ग्व । मनय् शंका । व हे वइनि धैथें छगू मनं धाइ, हानं मेगु मनं धाइ, मवलकि ला जि थ्व हे एअरपोर्टय् हे लछि च्वनाः वने जकं माली थें जुल । अपाय्धंगु पेरिसय् जिं गय् पलाःतयेगु? पेरिसया मतिनां जितः मछाःसे च्वंकाबिल । 

सम्पर्क गय्यानाः यायेगु? फोन ला तयातःगु दु अन तर क्रेडिटकार्डं जक चले जुइगु । मोबाइलय् खँ ल्हायेत न्हूगु सिमकार्ड तये मानि । वाइफाइ दूगु खनेवं काचाकाचां स्वम्ह पासापिन्त मेल च्वयाबिया— जि एअरपोर्टय् थ्यन, जि पिया च्वना धकाः । खिउँथाय् गोलीं कयेकेथें उलि जक जानकारी बिउसां कि काःवइम्ह व मेमेपिन्सं जि गन दु धकाः माली, अले उलि हे मजू सां कमसे कम जि पेरिसया एअरपोर्टय् दुतिन धैगु जानकारी ला दइ नि । तर गन अथे जुइ धकाः लिपा तिन खन, मेल अथें वनीला? वाइफाइ ला दु, तर ध्यबापुलेमाःगु खनीका । ध्वगीगु व्यवसायिकरणं गुलि जक लोभय् लाकी धैगु नि । जि लागिमिगि चाल ।

पलख पियालि जिगु लगेज थ्यंक वल । गनं दुर्घटनाजूगुया घाःखू मदु, साबुत हे दनि — बांलाःगु हे अवस्थाय् लिथ्यन जिगु लगेज । काचाक्क घय्पुयाकया । १६ घौतक तापानाच्वनेधुंकाः मामं थः मस्त लुइवं घय्पुया काःथें । थुलि ज्या सिधयेवं हानं जि याकःचा पेरिसय् दनाच्वनागु लुमन । बेर्ट शुवर्टं धाःथें याकःचा निगः निगः लगेज ज्वनाः पेरिसया सुनसान लँय् याकःचा लान्तांफान्तां जुयाच्वना थें म्हम्हि पिइसे च्वना वल ।

पिहाँ वये हे त्यनाबलये हानं कस्टम्सया पुलिसं छगू क्वथाय् यंकाः फ्यतुकल । हानं व हे गनं, छाय्, सुनां सःतूगु, ग्वःन्हु च्वनेगु, गन च्वनेगु धकाः कुतुकुलाः न्यन । भिसा तिकातःगु स्टीकर ख्वाराख्वारा यानाः स्वत । अले थन वयेत माःगु मेगु डकुमेन्ट दुला धाल । जिं जितः बियाहःगु ब्वनापौया कपित दक्व तयातयागु फाइल न्ह्यचाकाबिया । छगू छगू यानाः पुइकल । 

वं न्यन “ध्यबा १०,००० यूरो स्वया अप्वः हयागु दुला ?”

“मदु,” मिशिनंथें न्यँक्वया लिसः बिया । थ्व द्वःछि ला गनं गनं त्यानाः हया धाये मास्ति वःगु, सुम्क च्वना । 

“हयेमजिउगु हतियार सुर्तिजन्य व नशालाइगु वासः, ला, वनस्पति छुं हयागु दु?”

“मदु ।”

गन न्यनेकने यानाः सिइकी उमिसं, व ला औपचारिकता जकं का । स्वयेमाःगु ला जिगु लगेजय् न्हय्कः एक्सरे व मेमेगु प्रविधिया चस्मां चित्त बुझेमजूतले स्वये हे धुंकल जुइ नि । वाझ्वः छ्यातां क्यनाः पिने वनेगु लँ क्यन । जि काचाक्क हे दनेवल, मुक्ति जिगु नामय् च्वयातःगु आभास जुल जितः ।

पिने लबिइ थः मनूयस्सं लसकुस यायेगु थासय् मिख ब्वया । जितः म्हसिउम्ह मय्जु एलिजाबेथ लाम्बेर्ट वास्यां न्हिलाः दनाच्वन । 

“ए, मानन्धर !” धकाः सःतल । जिमिगु मिखा ल्वायेवं जि ला धाथें पेरिस थ्यंगु थें जुल । ट्रलिइ तयाः मफुमफु घ्वानाहयागु लगेज नं कपाय्या बोरा थें याउँल । इमेलय् जक खँ जूम्ह व लाम्बेर्ट गय् च्वंजुइ धकाः कल्पनाय् वयागु चित्र हे च्वये मफयाच्वंगु, आ खनेवं तिनि लुमन । वयात ला जिं थउने हे नाप लाये धुनागु नि । खनेवं जितः जिं वलिसे थउने डेनमार्कय् वनाबलय् लँय् दनाः यूरोपया राजनीतिया बारे खँ ल्हानागु जितः लुमन । जिं वयात डेनमार्कय् नापलानागु खँ लुमंका बिया ।

“खः जुइ, जिं नं वनागु अन । छ नं दूगु ला? ए, जितः ला ल्वःमनेधुंकल । बुरि जुल, उकिं जुइका ।” व वास्यां न्हिल । 
म्होतिं नं १०० केजिया ध्यांग्रामांग्रागु म्हयात वयागु ६२ दँ या उमेरं बांलाक हे कःघानातःगु दु । थः जक भाताभातां वनां मगाः जिगु लगेज न्हापं ज्वनाबिइ धकाः सालाच्वन । जिगु छगः ब्याग ज्वनाः नं स्पूmर्त कथं वं जितः पिने यंकल । एअरपोर्टंनिसें ट्रेन स्टेशनतक सितिकं तयाबिइगु शटल ट्रेनय् जितः घ्वानाः दुछ्वल । थः प्mयमतुसे जिः प्mयतुइत सीट क्यनाबिल । जिं वयात मोंपानासेनिसें लेमानय् वनेगु जिगु टिकट क्यना । घडी स्वल, अले धाल, “लाइनिति ला? यक्व वनेमानि मोंपानासेया स्टेशनय् थ्यंकेत तकं । मलात कि ला? पेरिसय् बाय् च्वनेमालीगु जुइला?”

एअरपोर्टया शटल टे«नं जिमित छगू स्टेशनतक थ्यकाबिल । पहिला अन झ्वः झ्वः एटिमथें च्वंगु मेशिनत क्यनाः धाल, “का स्व, थ्व दक्व टिकट मीगु मिशिनत का । राजनीति याइपिं थनया ध्वगीपिं नेतातय्सं न्हापा जनतायात जागिर बिइ, उगु बिइ थुगु बिइ धकाः ह्ययेकी अले सरकारय् वनेधुनकि जनताया प्वाथय् लाकमं प्यंकीगु थज्याःगु मिशिन तये हइ... कमिशन वइनि उमित ।”

अनं टिकट कायेगु थासय् थ्यकाः वं न्यन “छंके टिकट न्यायेत ध्यबा दुला?”

जिं दु धकाः धायेवं वं जितः काउन्टरय् यंकल । काउन्टरय् लाइन च्वनेत जिगु लगेज यंके मछिनाः छखे धस्वाकाः टिकटया लाइनय् च्वना । वं थःगु टिकट कार्ड क्यन अले जितः टिकट न्याकल, १,००० तका भचा जक मतूगु ।
स्टेशनय् वनेत ३६ केजी बराबरया सामान ज्वनाः हुतुतुतं स्वाहाने क्वहाँ वना । मनूतय्गु भिड उलिंतुं । वयागु न्हापांगु दिन जुयाः दक्व लगेज जिं हे क्वबियाच्वनेमाल । वयात थ्वयात उपहार बिइमाःगु धकाः मन्ह्यं मन्ह्यं कोचेयानातयागु भारी जिगु ब्वहलय् लानाच्वन । घ्वातुमतु घ्वाःगु थ्यकंला मखु, तर जिगु लगेजं उमिगु लँ पंगु धाःसा जिं चाः । मुसुक्क न्हिलाः तं क्यना वनी । जिं नमवासे क्षमा फ्वनाबिइ ।

गुगुं स्टेशन जमिन दुने, गुगुं जमिन पिने । गनं गनं जक लिफ्ट व एलिभेटरया ब्वयस्था दु, अथवा दुथाय् नं गनथाय् दु धकाः मालाच्वनेगु स्वयाः याकनं स्वहानें वंसा अःपुइगु । उलिउलिमछि सामान निपा ल्हातिं ल्वनाः फय्लिंचा थें हुरुरुरुं ब्वाय्वनेमाल — गबले निगू स्वंगु तला च्वय्, गबलें निगू स्वंगू तला क्वय् । थाहाँ क्वहाँ जुयाः निपा ल्हाः अले निगः पुलि कुतुं वइथें जुइधुंकल । 

टे«न लुइवं थःतथम्हं लुचुक्क बुयाः दुने स्वथनाबिया । मेपिं दक्व मनूत, जि छम्ह विदेशी अन । दकवस्यां गःपः तःहाकःयानाः स्वयाच्वन । दुने धाःसा जिगु लगेज तयेथाय् मदयाः लँय् जूपिं अतःमतः क्यनाच्वंगु लिं जितः मछिना च्वन । स्पीकरं अन थ्यन थन थ्यन धकाः धयाच्वन । जितः जि नेपालय् तिनि थें जुयाच्वन । लँय् छम्ह मनुखं ल्हाः ल्ह्वनकि झिंन्यातका दां दनाच्वंगु तायेकाः माइक्रोबस घ्याच्च दिकी, न्ह्यःने लिउने सुयात मछिनी धइगु नं मदु, दुने च्वनेगु ला छु दनेगु थाय् तकं दुला मदुला धइगु नं मदु । धाथें जि नेपालय् फ्रान्स मखं, फ्रान्सय् थ्यनेवं नेपालय् थ्यन । 

पलेस्वां नेपालभाषाया साहित्यिक दँपौ थ्यं ल्याः ७य् पिदंगु ।  

No comments: