Tuesday, April 26, 2016

फरमाइस समालोचना

सम्पादकजु,
नांजाःम्ह उपन्यासकार मथुरा साय्मिया न्हूगु उपन्यास खालु पिदन । भिंतुना । आः वय्कलं व सफूया बारे प्रतिक्रिया च्वकाः उकिया सफू पिकायेगु बिचाः यानादीगु दु । थथे यानाः हे खः झी ब्वमिपिन्त ब्वंकेगु अले ब्वनाः थःत मतिइ लूगु भ्वँतय् च्वकेगु । तर थथे च्वमिया फरमाइसय् वइगु प्रतिक्रिया गुलि तक निष्पक्ष अले निर्भिक जुइ धइगु न्ह्यसः दु । सफुतिइ थःगु च्वसु वइगु आसं लय्तायेकेत बांलाः बांलाः जक धयाबिल धाःसा च्वमिया उद्देश्य पुवनीमखु । 

खयेत ला झीथाय् समालोचना च्वयाबिउ धकाः बिन्तिपत्र मतयेकं च्वयेमाः धकाः हे मसिउपिं समालोचकत दु । दु छु, थः यसें च्वइपिं हे मदु धाःसा पाइमखुगु अवस्था दु । छम्ह च्वमिं थौं थःगु सफूया प्रतिक्रिया च्वयादिसँ सिरपाः दइ धकाः सार्वजनिक रुपं धयाजुइमाःगु अवस्था हे नं नेपालभाषा साहित्यया निंतिं उपहास खः, हाथ्या खः । थज्याःगु हाथ्या बिइगु आँट यानादिइम्ह साय्मिजुं खँ जक सयेकाः नइपिं नेपालभाषा साहित्यया ठेकेदारतय्गु ख्वाःपाः उलाक्यनेगु ऐतिहासिक दुस्साहास नं यानादीगु जुल ।

थ्व इनापं नेपालभाषा ख्यलय् समालोचना याइपिनिगु अनिकाल दु धइगु स्पष्ट याःगु दु । थज्याःगु धायेकाः तक नं प्रतिक्रिया मबिइपिं, मताःछु यानाच्वनीपिं अले बिइभाः मखंपिं समालोचकतय्त मच्वसे समालोचक जुयाजुइपिं मधाःसा छु धायेगु? आः नेपालभाषा ख्यःया डाक्टर, प्रोफेसरत अले भाषा ख्यःया उगुं थुगुं सिरपाः, हनापौ क्वबिया जुइपिं कथित समालोचकत तंगु सार्वजनिक सुचं पिकायेमाःगु दु । सलिंचाय् लःतयाः सुनां सुनां छु छु यायेमाः याःवंसा बांलाः । मेगु छु धाये ।

थ्व पाय्छि ज्या मखु धइगु प्रतिक्रिया नं ब्वनेदत । पाय्छि खः जिं नं मधया । बरु फरमाइस यानाः प्रतिक्रिया कायेगु थः हे बांलाःगु ज्या मखु, झीगु परिस्थितिजन्य बाइप्रडक्ट जक खः धकाm तायेका । अथेसां उकियात नकारात्मक रुपं जक मकासें थथे फरमाइसे समालोचकत पाखें हे कन्हय् सुं धिसिलाःम्ह समीक्षक वा समालोचक जन्मेमजुइ धकाः गथे धाये? धकाः सकारात्मक जइत इनाप यानाच्वना । 

राजेन मानन्धर
गुलिंगाः, यल ।
Published in Sandhya Times on April 26th, 2016.

No comments: