राजेन मानन्धर
– थ्व प्लेन ला मेथाय् हे यंकल न्हैं ।
लिउने छम्हस्यां हहपंगु सलं धयाहल । जिं तीजक लिउने स्वया । मेपिन्सं छु छां मधाः, मिखा जक ततःग्वः ।
– म्वाः मदूगु खँ ल्हानाच्वनी, साप जान्या जुइमाःम्ह मनू खनीका थ्व । धयाछ्वयेमास्ति वल, अँ खः, थ्व प्लेन हाइज्याक जुल । आः झीत कन्दहारय् यंकी, धकाः ।
सुनां नं छुं मधाः । मेपिन्सं सि हे मसिउ जुइ वं धाःगु । सुनां छुं सिहे मसिउ । अले व ग्वाखंचा थज्याःगु झ्यालं स्वयां गन थ्यन धकाः सिइदइगु मखु । सिइकेमाःगु अवस्था नं मखु । स्थिति सामान्य । प्लेन क्वंक्वं यंकूगु चाः । दिके त्यल थेंच्वं ।
– झीगु प्लेन धनगढी विमानस्थलय् थ्यन । दिकेत्यल । कृपया न्हयःनेच्वंगु सुचं मत च्यानाच्वँतले थःगु सिटबेल्ट लिकानादीमते, विद्युतीय उपकरण च्याकादीमते ।
उद्घोषण वल, मिशिनया सः थज्याःगु निरस सः । जि मुसुं न्हिला, मानौं जिगु निःशब्द युद्धय् त्याःगु घोषणा यानाबिल वं । जि त्यात धयाथें तीजक न्हाचः मेथाय् यंकल धाम्हसित ख्वाः स्वया । स्वया स्वयाः नं जितः वयात ख्वाः क्यनेमास्ति वल, जिगु त्याःगु ख्वाः । दक्वं वनेत्यल धकाः म्ह तप्यंकल । कालकुल हाःसः तायेदत । घौछि व चकंछि तःहाकःगु कैदं मुक्त जुल जिपिं ।
तर उघ्रिमय् असामान्य ख्वाः ब्वयाः बुद्ध एअरया परिचारिका मय्जु तीजक न्ह्यःने वल । भावशून्य ख्वाः ब्वयाः छकः छकः याना परिचारिकां तीजक स्वांपुइथें न्हाय्पनय् न्हाय्पनय् वयाः धाःवल – झीगु विमान धनगढीइ वनेत्यंगु ला खः, तर एप्रोचय् मौसम स्यंगुलिं लितहल । आः पलख लिपा झी नेपालगंजय् कुहाँ वनी ।
वया नं ख्वाः ह्याउँसे । जिमिगु नं ख्वाः ह्याउँसे च्वन । जिपिं छकलं आकसं कुतुं वःथें जुल । पिने नं छकलं निभाः द्यः खिउँसे च्वन । जितः ला मस्त ह्ययेकेथें धकाः यात । जिं छुं हे बिचाः याये मफुत । प्लेनया रुट पायेधुंकूसेंलि अज्याःगु खँ चाहिं उद्घोषण यायेम्वाःला ? घुसुघसु यानाः कंवयेगु ला? जितः तं नं पिहाँ वल । मिखया न्ह्यःने छु छु दृष्यत प्याखं हूवल ।
थौं २०१५या जुन २०, शनिबार । जि, विन्दु, अञ्जु तता व सुसन तता धनगढीइ वनेत्यनापिं । अन स्वंगू जिल्लाय् बालिका विरुद्ध यौन हिंसाया अवस्था गज्याःगु दु धकाः म्यापिङ याःवयापिं । झिंप्यदँ न्ह्यः नैनिताल चाःहिउ वनेगु झ्वलय् सुदुर पश्चिमय् पलाः तयागु खःसां जितः अन, विशेषयानाः अछाम वनेदइगु जुयाः जिं नं थःत थ्व ज्याझ्वलय् न्ह्यंकागु । सुन्दर सुदुरपश्चिम...सुदुरपश्चिमया बारे उलिमछि न्यनातयागु दु , न्हाय्पं हे हिइसे च्वंक । थःगु हे मिखां स्वयेगु प्याचालं जितः थन तक हल ।
सुदुरपश्चिमय् पलाःतये न्हयः हे सातु काल । आः गन गन यंकीगु मसिउ । थ्व चक्रव्यूहं जितः सुदुरपश्चिमया प्याखं हे क्यंगु थें जुल । प्याखं ला छु, थ्व ला ट्रेलर जक जुइ, प्याखं ला ल्यं हे दनि । आः वये हे धुसेंलि न्ह्यागु क्यंसां स्वये । जुहे जूसा मेगु छु जुइ, हदं जूसा इराकय् लाःपिं झिंछम्हसिगु ति हविगत जुइ । जिं जिगु मनयात थुइकाबिया ।
प्लेन दुनेया वातारण छकलं अन्यौलपूर्ण जुल । दक्वस्या गःपः तःतःहाकः जुल । मखंगु, मकंगु, खनेमदुगु छुं खतरा महशुस जुल । चहलपहल दु, तर हाःसः छतिं हे मदु । चःति हे पिहाँ वःथें वःथें जुल । दुरुपिपिचा थज्याःगु ह्वतं वःगु एसिया फसं गन गाइ, झ्याःया खाः हे तछ्यानाः सर्गतय् च्वंगु फय् दक्व दुकायेथें जुयावल । चःतिं गःपः न्हापं प्यात ।
जिमिसं सिउ स्थिति सामान्य मखु । छुं न छुं जूगु दु, वा जुइत्यंगु दु । धाःगु जक उलि का जूगु गुलिखः गुलि । न छुं दुर्घटना हे जुइत्यंगु पूर्व संकेत ला ? द्यःया नां कायेत्यल ला ? जितः धाःसां सुनं द्यःया नां नं लुममं । थम्हं सिउगु मखु । दुने मनय् धौबजि वाःथें, उकुन्हु तिनि ब्वःगु भुखाय् हे ब्वःथें । तुति झ्वःलंकाः हवाइजहाज दुर्घटनाया समाचार ब्वनेगु व समाचार हे जुइगु हवाइजहाजय् दुने च्वनेगुलि आकास जमिन पाः । झ्यालं पिने स्वयां मिखां छुं छुं हे मखन, मतिइ नं छु छु वइ छु छु वइ, त्यःगुं मत्यःगुं । कासा धकाः लुखा चायेकाः तिंन्हुइजिउगु नं मखु । अथेसां ख्वालं चिन्ता व ग्याःयात पित वयेके मबिया । जिं पनां मनेमफयेक वःगुयात छु याये जिउ । चातःचताःगु बुँ अले वाउँगु जंगल खनेदयेकःवल चिकीचिकीपाःगु झ्यालं । गन गन । छकः जवं ध्यचुल, छकः खवं ध्यचुल । थ्व निगू मिनेट जिमित निदँ स्वयाः तःहाकः जुल । न झापाय् यंकल ला, न कन्दहर हे थ्यन ला ।
पलख लिपा प्लेन दित । सिटं दनेमते, थन च्वनाच्वँ धइगु संकेत वल । ताःन्वयाः वाथा वाथा कन । पिने झं गुलि तांन्वः जुइ । न्ह्यागुसां थन दुनेथें हसंमसं ला धायेकाच्वने मालीमखु नि । आः न्ह्यागुसां प्लेन दिइ हे धुंकल, थ्व थाय् धनगढी खहे मखु । स्थिति असामान्य ला जूगु हे खः । अय्सां अझ सुनां नं दीपेन्द्रं भाटाटाटाटा यात धाःगु थज्याःगु मेशिनगन लिकयाः जिमिगु न्हकुइ दिकः हे नं वइमखु धायेफूगु मखु । जिं चाल, जितः ला तसकं हथाय् जुल । वनेगु गन? प्लेनय् दुने चःबि मदु, पिने वनेमते धाल, पनां पने हे फूगु मखु । उफ् । झ्यालं पिने स्वया । पिने स्वयां सुं दनाच्वंपिं नं खने मदु, चक्कंगु फाँट जक । नेपाल हे खःला मखु ला । खने दुथाय् तक छुं अनिष्टया संकेत ला मदु । अय्नं मनूत हे मखनेमदुगु थासय् छु निष्ट, छु अनिष्ट । टावर ला खना, तर अन छुं च्वयातःगु ब्वने मफु । नेपालगञ्ज नं खःला मखु ला ।
– गन मौसम स्यंगु? जिं नकतिनि धनगढीइ च्वंम्ह पासायात फोन यानागु । व जितः कायेत एअरपोर्टय् वयाच्वना हँ । म्वाःमदुगु खँ ल्हाइ ।
– जिमित वःगु खबर अनुसार अन एप्रोचय् मौसम स्यन हँ । दुहाँ वनेगु सम्भव मदु हँ । मेगु ला जिं नं मसिउ ।
परिचारिकां थःगु हिं बुलाथें ह्याउँगु ख्वाःलय् न्हिला तिकेगु कुतःयात । जिं सिउ वयात मछिनाच्वंगु दु । वयागु मेकअपं वयागु नुगलय् च्वंगु ग्याःचिकु नं सुचुकेफयाच्वंगु मदु । आः धाःसा जिगु नुगलय् ब्यांचा तिंतिंन्हुल । खइ, मखइ । थन मेगु हे छुं जुयाच्वंगु दु । धा जक मधाःगु ।
सवा एकय् प्लेनया लुखा चाल । न्हापां लिउने च्वंपिं पिहाँ वनेगु अले जक जिमिगु पाः वइ धाल । हथाय्पिन्त न्हापां छ्वयाबिउसा गुलि जिउ । धाः स्वये जिपिं अनया डिपार्चरया लाउन्जय् हे फ्यतुनाच्वनेगु हँ । मखुगु, मजिउगु ला छुं मखुथेंच्वन । पिने थ्यनेवं नेपालगञ्ज च्वयातःगु खन । हथाय् जूगु नं ल्वःमन ।
नेपालगञ्ज एअरपोर्टय् थ्यन जिपिं । हसक्क ताःन्वलं पाचिउँवल, प्यपुंक हे । गपाय्च्वः मयः जितः अथे याइगु । यःमयः धइगु नं ला दइ नि । तर उलिमछि ग्यानागु सितिं हे जुयाच्वन । अन छुं अज्याःगु मखु खनी । खालि मौसमया हे जक दोष हँ । झ्वःलिक्क पिहाँवया । अन पिने दनाच्वंपिनिगु मुसुकाःगु ख्वालं आनन्दया सासः ल्हाकल । जिं छातिइ ल्हाःतया । आःतकं धुकधुक हे तिनि । ग्यायेम्वाःल आः, छुं जूगु मखु – जिं थःत थम्हं धया ।
डिपार्चर पाखेया लुखा चायेकातल । अज्याःगु तान्वःथाय् व निगू स्वंगु पंखाया फसं गन गाइ ? सुयात नी बिइ व छम्हूचा छम्हूचा फय् । लाकालुकु हे जुइ । चय्त जुयावःगु भुतुमालि बँय् लाःबलय् लाकालुकु जुयाः सुयातं मदुथें । थ्यनेसाथकि मनूत फोनय् व्यस्त जुल । लाःसा खबर वन जुइ धनगढीया प्लेन डाइभर्ट जूगु । लिसः बिउबिउं हैरान मनूत । जिं जिगु फोन हे मच्याका ।
चुलुगु टाइलया बँय् सियुम्ह बुँचा छम्ह । गःपः ल्ह्वनाः फुँइ यानाच्वन । ग्वाय् नं फुइँफुइँ च्वं । फुसा वा धाःथेंच्वं । का लप्पा नं संकल, खम्पा नं ल्ह्वन । कुस्ति ल्वाइम्हस्यां चुनौती बिउगुथेंच्वं । जिमिगु विवशतायात चुनौति । छम्ह सिकापतिंपाय्धिकःम्ह बुँइचां तकं हेपेयात, थ्व गज्याःगु जिमिगु अवस्था । वं वयागु ख्वाः स्वल, वं वयागु ख्वाःस्वल । दक्वं हिस्स । ध्यबा मदुगु खाताया चेक कयाहःपिंथें ।
पलख लिपा कोक छगः छगः सितकं वल । कथु नं प्यात, मन नं भचा थाहाँ वल । सुं मदुपिं हे ला मखु खनी जिपिं । जिमिगु नं पाः वइनि । आः धाःसा व बुँइचित नरथक्क हक्केमास्ति वल । गन वन थें मसिउ व ।
साडे दुइ बजे एअरपोर्टया लुखा चायेकल । जिमित लिहाँ वनेगु संकेत वल । दक्व घ्वारारारा प्लेनय् च्वंवना । फुक्कं मुसुमुुसु काः । दुनेंदुनें ला तं पिहाँ वः जुइ, तर सुयातं ब्वह बिइजिउगु मखु । दक्वसिया छघौत्या ई सितिं वन । मेपिने गन छु छु स्यन जुइ, छु छु पन जुइ । आः तं चायां नं लाःगु मखु ।
पौने तीनय् धनगढीइ थ्यन । पिने बन्जर जूसां एअरपोर्ट धाःसा नेपालगञ्जयागु स्वयाः बांलाः । जिमिगु सामान मवःतले पिया । भचा घारांघुरुं जुइगु ला नेपालय् सामान्य हे खँ जुल ।
जिमिगु गाडीया ड्राइभर राम दास चौधरी जिमित पियाच्वन पिने, थःगु गाडी ज्वनाः । सामान कायेथाय् भचा लाकालुकुया ज्या क्वचायेकाः जिपं वयागु गाडीइ च्वना । निभाः छाःसां फय् सिचुसेच्वं । लिपुलिपु खय् नकतिनि पिनातःगु वामा मछाः मछाः म्हुतुप्वाःतिनाः न्हिलाच्वन । नच्चापिं न्यासिचाःपिं मिस्तथें । धयाच्वन जुइ, भच्चा मगाः छिमित, अझ निघौ स्वघौ अन हे आकसय् फनफन चाःहिइकातःगु सा जिउगुनि । अथें अःपुइ ला जिमित नाप लाये?
No comments:
Post a Comment