नयेगु मखुला ममः चाउमिन ?

 

राजेन मानन्धर

नेवाःत दक्व हे भात्तेत । बेइमान भात्तेत । न्ह्याबलें जा, न्ह्याबलें जा, न्ह्याबलें जा । अले भात्ते मधाइ ला ? भात्ते मधाःसा छु धायेगु ले ? गुलि जक नयेमाःगु धइगु का व जा ।

खँ सवाःया खँ । मसःपिं न्हिछिं व हे जा केँ जक नयाः हे बुराबुरि जुइ । सःपिनिगु खँ ल्हायेनु ले । सःपिनि ला थौं जा, कन्हय् ममः कंस चाउमिन । अले इलं लाकाः, थाय् स्वयाः गबलें चप्सी, गबलें सिजलर, गबलें छु, गबलें छु का । थज्याःगु धकाः जिन्दगी ।

खँ इहिपाया वइ । इहिपा न्ह्यः ला छकःनिकः इलं लाकाः थय्क होटल, रेष्टुरां अले भट्टि पसलय् वनाः नं सुनां नं मखंक छ््वयला, कचिला, जँला, नं नइवइ झी पासापिं । भगवानं म्हुतु बियातःगु हे साःगु नयेत । अथे जुयाः ला “इलं मबिइका चौरासी घासा न्ह्यःने तयां छु याये, आः म्हुतं नये नये धाःबलय् नये मखंसा” धाधां साःसाःगु सवाः काः वनी । अथे जुयाःयाथाय् थासय् थीथी सुविधा दूगु साःसाःगु नयेगु होटल, रिसोर्टया व्यवस्था जुयाच्वंगु दु थ्व स्वनिगः अले उकिया चाकःलिं च्वंगु भीरपाखाय् ।
खँ थन इहिपा मजूनिपिं बाउचा मैंचापिनिगु जक मखु, इहिपा धुंकाःया खँ झन् ग्यानापु । सिल ला छिं?
साःगु नये सुया मयइ ? छेँय् हे दत धायेवं व न्हिं न्हिं स्वाकास्वाकाच्वंगु जा व प्वलंचा तरकारी सुया यइ ? न्हापा धकाः कि हथाय् जुल धकाः मिखा कां जुयाः न्हयःने लाःगु नयेलाइ, कि मां अबुं ज्वंकाबिउम्ह हे थः धकाः छ्यं ल्हुकुल्हुकु संकाः ह्वंका वइ । अले लिपतय् धकाः वाःचाइ, का थ्व ला चि मगाः, कि पाउँसे च्वं, कि जाय् फि वयाः वा किरिकिरि न्ह्यइ । अले शुरु जुइका ममः चाउमिनया बाखं ।

अले ला जागिर नं भचा धिसिलाइ, थःके क्याँथक्याँथ ध्यबा ल्हातिइ दइ, उखे मय्जुपिनि नं उगुं थुगुं यानाः भचा समाजय् इज्जत कमेयाइ, थ्व ला खः का धायेकेफुम्ह धायेकाजुइ । अथे ला मय्जुपिनि झन् अःपु, भगवानं बिउगु जक क्यने दुसा हे गाः । भाजुपिं ला आ सूरि धाःथें लिउलिउ हे वइ । अले चालीका ममः चाउचाउया सवाः कायेगु लुखा ।

गुलिस्यां अफिसया हाकिम व सेक्रेटरी, गुलिस्या ज्वलिंज्वः कर्मचारी, गुलिस्या बिजनेस पार्टनर । ज्या मयासे सुया नयेदु ? जिमि ज्या नं यायेम्वाःला ? जि ला थम्हं कमेयानाः सक्षम जुयाः दुनियायात क्यनेमानि धाधां सु गुलि सक्षम धकाः छामछाम छुमछुम याःजुइ । (गुलिस्यां दुकुलुगु लुइकी, गुलिस्या ल्हातिइ लाइ दुने फुस्कुलुगु बरां, थ्व खँ मेगु हे जुल) । लुचुक्क बुयाः तलय् यंकाबिइम्ह दसेंलि हानं सुनां मफु मफु स्वाहाने गयाच्वनी ? जमाना हे फास्टफरवार्डया जुसेंलि ।

आः न्हापाथें झ्याः क्वय् पिउवयेम्वाः, कःसिं कःसिं स्वानंं कयेके नं म्वाः आः । ल्हातिइ ल्हातिइ मोबाइल दु, फेसबुक, ह्वाट्सएप, भाइबर छ छु माः व व दु । अफिसया खँ ल्हाल्हां फिसया खँ नं जुइ । अफिस आवर नं धायेम्वाः, अर्जेन्ट खँ जुया हे च्वनी, मजिमगाःगु धायेत सुथय् नं च्वयेमालेयः, चान्हय् नं च्वयेमालेयः । फोन हे वःसां छु यायेजिउ? सुनां नं मतायेक कःसिइ वनाः खँ मिलेयायेमालेयः । क्यान्टिनय् नापलालां रेष्टुरां थ्यनी, रेष्टुरां धाधां होटल थ्यनेत नं आइतबार म्वाः । अथे ला अफिसया ज्यां थी थी जिल्लाय् वने नं माले यः । अज्याःबलय् मेपिं सुं मदयाः व हे हाकिम व सेक्रेटरी, व हे न्हापा नापं ट्रेनिङ कयापिं पासापिं अथवा बिजनेश पार्टनर हे जक मिलेजुयाच्वनी । वनाः कन्हय् सुथय् न्ह्यःमगाः ख्वालं फोटो पोस्ट यानातःगु खनाः छेँजःपिनि पीर जुइ, ओभरटाइम यायेमाः जुइका, गुलि जक ज्या यायेमाःगु हला ? धकाः खँ नं जुइ । तर ज्या यायेमाःपिन्त सुनां पनी । आखिर ज्या यानाः थःगु क्षमता क्यनीपिन्त समाजं कदर या हे याइ । मेपिन्सं छु सिउ धकाः छेँ जा नयां मगानाः पिने वनाः ममःचा चाउमिन नइपिनिगु क्षमता ।

छकः सवाः वलकि सवाःया बाखं हे मेगु जुइ । म्हुतुया सवाः म्हुतुं जक थुइगु । ममः चाउमिन धइगु ममः चाउमिन हे का । गन व ध्वगी नवःगु जा, गन अजिनोमोटो तयाः दयेकातःगु ममः चाउमिन । अज्याःगु धइगु छकः मनःतले जक का । छकः सवाः वलकि जा नयेगु हे ल्वःमनी । सुं हे लुमं जुइमखु, काय् म्ह्याय् हे लुमं जुइमखु । बस, व हे साःगु छतांबेस जक नये दुसा गाइ ।

आः ला जमाना हे आधुनिक । न्हापा जक वं धाइला थ्वं धाइला धकाः ग्यायेमाः । आः ला ममः चाउमिनया फेसन चलेजुयाच्वंगु दु । धाथें धायेगु खःसा सु पिने वनाः ममः चाउमिन नयेमसः व ला गामाः का गामाः । जा माः धायेगु ला गामाः धायेगु ला । यःसां मयःसां छेँय् बूगु जा जक पाकापाकां नयाच्वनेत, अथवा मयःसा द्यां हे लानाः द्यनेत भगवानं झीत थन छ्वयाहःगु ला ?

थ्व धइगु थःगु अधिकारया खँ नं खः । न्हापा मिजंतय्सं जक ममः चाउमिन नयाः हैरान याइगु । उमित बदला कायेगु सा मिस्तय्सं नं थ्व सयेकेमाल । धाइ न्हापं जिगु म्ह, जिगु अधिकार । थःत गनया गज्याःगु ममः चाउचाउ यः व हे नकेगु का । थ्व भगवानं म्हुतु मसाःगु नयेत बियहःगु ला? यःगु साःगु नयेगु नं समान अधिकारया छगू सिद्धान्त दुने लाः । जि छु यः व नये, छन्त छु मतलब? धकाः धाये सयेकेमाः । कलाः भाःत धइगु करंबरं च्वनेगु सम्झौता मखु । यःसा नापं नयेगु मयःसा पिनेवनाः नःवनेगु । थ्व हे थौंया समानता खः । छेँ जाजि थुइगु, नयेगु, अले अफिस वनेगु । अन अफिसय् अले अफिस धुंकाः नं गन गन वनाः छु छु नयेयः व नयेगु अले बहनी लुसुक्क छेँय् वयाः थौं अफिसया ज्यां तसकं त्यानुल धकाः भ्वाक्क लासाय् द्यनेगु । गुलि नयेगु व स्वाकास्वाकागु जा, नयेगु का साःथाय् वनाः थी थी सवाःया ममः चाउमिन । थ्व हे का आधुनिक जीवन ।

(पेज थ्री सायाः ल्याः २०२१)

https://elohanprakashan.com/?p=1999&fbclid=IwAR0-LQUcDjBBwAzEwveTTxRzCGQTCRh2X1SEOGm8D7kxyrn16V4JUzsbNyU