20150709 हरि पराजुली, मिसा अधिकार व सामाजिक मिडिया

न्हापा न्हापा शासक धइपिं जनताया नःमनः स्वयाः जक नइपिं जुइ धइगु झीगु मान्यता दु । तर आः वया सु सु सत्ताय् वइ, उमि मनय् न्हय्गू पुस्तायात कुगाक्क कमेयानावनेगु अले जनतायात थःगु न्ह्यबसा तायेकेगु जक जुयाच्वंगु दु । थज्याःपिं मनूत पाखें मानवता व नैतिकताया आशा आः मनूतय्सं मयायेधुंकल । व स्वयाः नं आः छम्ह निम्ह मनूतय्सं सत्ताय् थ्यनेवं न्ह्यागु याःसां जिउ, जि कानून स्वयाः च्वय् धकाः मतिइ तइगु जुया वल । उकिया छगू दृष्टान्त नेकपा एमाले पाखें कृषि मन्त्री जूम्ह हरि पराजुली जूवल । थ्व दँया हे छगू चर्चित हरि पराजुली काण्डं व स्वयम् जक मखु नेपाःया सामाजिक सञ्चार व महिला अधिकारकर्मीपिनिगु हैसियत नं क्यनाबिल ।

झीगु भौगोलिक अवस्थां यानाः असारं यक्व वा वइ । उकिसं असार १५यात वा पिइगु विशेष दिं कथं कयाः सरकारं हे धान दिवस धकाः क्वःछिनातःगु दु । व हे कथं वा पिइगु ज्याझ्वलय् जून ३० कुन्हु येँया मुलपानी गामय्् मूपाहाँ कथं वंम्ह हरि पराजुलीं अन वा पिइगु स्वयाः ध्याचःगु लखय् न्या लायेथें स्थानीय मिस्तय्त भौतिक आक्रमण हे यायेगु ज्या सं जुल । वं छम्ह धुंकाः मेम्ह मिस्तय्त ज्वनाः घय्पुनाः थाथामाथा यानाः उमिगु छातिइ छातिइ थःगु ख्वाःपाः चूवंगु दृष्य छापाय् वल, टिभिइ खनेदत <https://www.youtube.com/watch?v=Y728FWJE8CQ.> |

मिसां तंक्यन , ल्हाः पालाः सराः बिल । मेमेपिं नं न्हिलाः जक हे च्वन, वया अङ्गरक्षकं नं छुं मयाः । ध्याचलं बुलातःगु टिशर्ट फिनातःम्ह मन्त्रीं व मिसायात जँय् ज्वनाः घय्पूगु, मिसां मयः धइगु भाव ब्वयाः ख्वाः स्यंकाः मन्त्रीयात ख्वालय् हे घ्वाःगु, थ्व दृष्य खनाः मनूत न्हिलाच्वंगु वा अद्भुत चाःगु दक्वस्यां खन । अथे हे वं हानं मेम्हसित नं जँय् हे ज्वनाः साःगु नं सञ्चार माध्यमय् खनेदत । व स्वयाः यक्व ला थ्व खँ अनलाइन समाचारय् वल हे अनया प्यपाः न्यापाः किपा भाइरल धायेमायेक हे शेयरिङ जुल ।

नेपालय् मिस्तय्त मिजंतय्सं बांमलाःगु मिखां स्वइ, बलात्कार लगायत अन्य यौन हिंसाया शिकार जुइ वा जोखिमय् दु धकाः धयावयाच्वंगु तःदँ दयेधुंकल । थज्याःगु घटना गनंगिनं खनेदइ, दोषीयात सजाय नं जुइ । तर थज्याःगु ज्या तिन्हिनय् छम्ह मन्त्रीया पद धारण यानाच्वंम्ह मनुखं दक्व समाज व मिडियाया न्ह्यःने याइ धकां सुनां नं बिचाः हे यानाच्वंगु मदु । मिखां खनकि तिनि हे सत्य प्रमाणित जुइ । थन नं थथे हे जुल । गुम्हस्यां ट्रोल दयेकल, गुम्हस्यां जोक दयेकल ।

थुकियात कयाः ब्यापक टिकाटिप्पणी जुल । नारायण वाग्ले, जया लुइटेल, जैनेन्द्र जीवन, मातृका पौडेलया अभिव्यक्ति उल्लेखनीय जू । एमालेया नेतातय्सं लयागत संसदय् तकं थ्व खँ बय्बय् जुल । वरिष्ठ पत्रकारतय्सं न्हापां फेसबुकय् व ट्वीटरय् थःगु तं प्वंकल । वं अय्लाः त्वनावःगु धाल

<http://kathmandutoday.com/2015/07/114537.html> । गुम्हस्यां व्यंग्य यात <http://www.pahilopost.com/content/-5493.html> । थ्व अभिव्यक्तिया स्वतन्त्रता दूगु थासय् छम्ह सार्वजनिक पद धारण यानातःम्ह व राज्य पाखें सुख सुविधा कयातःम्ह पाखें जुसेंलि थथे जुइगु अस्वभाविक मखु ।

दकलय् न्हापां ला जनताया पाखें हे सः थ्वल । थ्वयात महिला विरुद्धया हिंसा धाल, मन्त्री पदं बरखास्त यायेमाः धाल, वयात सुधार गृहलय् छ्वयाः मानसिक रोगया उपचार यायेमाः तकं धाल । विद्यार्थीतय्सं मन्त्रीया राजिनामा फ्वन, कतांमरि दयेकाः च्याकल ।

न्हूगु महिला हिंसाया कानूत कथं मिस्तय्त ज्या यायेथाय् दुव्र्यवहार यात धाःसा खुला तक जेल सयाय व ५०,००० तक जरिवाना जुइफु अले मर्यादित पदय् च्वंपिन्त १० प्रतिशत यक्व सजाय जुइ ।

बिबिसि लगायत थी थी माध्यमय् अन्तर्वार्ता जुल, मन्त्री नं थःगु बचाउ यायेगु भरमग्दुर कुतःयात <http://www.ekantipur.com/2015/07/02/top-story/minister-parajuli-finds-hi... आखिर व असफल जुल । पार्टी पाखें हे ब्वह बिउगु इत्यादि चर्चा परिचर्चा दुने जुलाइ ३ कुन्हु मन्त्री राजिनामा बिइत बाध्य जुल < http://www.ekantipur.com/2015/07/03/top-story/under-fire-agriculture-min... । शायद १९९०या राजनीतिक परिवर्तन धुंकाः थज्याःगु घटना दकलय् न्हापां जूगु जुइ ।

थुकियात मनूतय्सं थी थी दृष्टिकोणं विश्लेषण यात । गुम्हस्यां थ्व एमालेयात कमजोर यायेगु षडयन्त्र तायेकल, गुलिस्यां संविधानपाखें मनूतय्त ध्यान लिकायेगु योजना धकाः धाल । विपक्षीतय्सं वयागु राजिनामायात विजयया रुपय् काल ।

सञ्चार माध्यमय् व विशेष यानाः सामाजिक माध्यमय् मवःगु जूसा थ्व छगू न्ह्यइपुगु घटना जक हे जुयाः फुना वनीगु जुइ । तर थौंकन्हय् थःगु खँ धायेत सम्पादकयात पौ च्वयाः सेन्सर जुइकाच्वनेम्वाः । न्ह्यागु भासं थःत मतिइ लूगु तप्यंक धायेथाय् दु, छिगु खँ विश्वया कुंकुलामय् थ्यनी, हानं उकिया तुरन्त प्रतिक्रिया नं वइ, विश्वय् हे छगू लहर वइ । थुकिया दृष्टान्त जुयाबिल हरि पराजुलीया राजिनामा । गज्याःगज्याःगु जुल थ्व प्रजातान्त्रय् मन्त्रीया राजिनामा बिइम्वाः, छम्ह मिसायात घय्पूगु कारणं थःगु मन्त्री पद वन । थौंकन्हय् छम्ह मनुखं मन्त्री पद छगू कायेत गज्याःगज्याःगु सिद्धान्त, नैतिकता व मर्यादायात हाचांगाइ धइगु झीसं सिउ । मन्त्रीया मन्त्रीपद जक मखु दक्वंसक्वं वन । वयागु राजनीतिक जीवन हे समाप्त जुल धइगु अवस्था थ्यन ।

खयेत थ्व महिला हिंसाया हे सवाल खः । थुकिं मिस्तय्त ति मेपिन्त छु थिइ ? तर अजूचायापूगु खँ छु खःले धायेबलय् थज्याःगु निन्दनीय व शर्मनाक ज्या देय्या मन्त्रीयापाखें सार्वजनिक थासय् जुलं न मिसा अधिकारवादीतय्सं गनं सः तयेमाःगु आवश्यकता मतायेकल । कुमारी परम्परायात कानून हयाः दिकाबिइ धाइगु अनेमसंघ मिसा अधिकारया लागि ल्वाइगु संस्था लाकि थःगु पार्टीया मिजंतय्गु रक्षा याइगु संघ धकाः नं सिइदत । विद्यार्थीतय्गु विरोध ज्याझ्वलय् तकं मिस्त स्वयाः मिजंत यक्व खनेदत । फेसबुक व ट्वीटरय् थःगु मनया खँ तयेगु, छपु निपु लेख च्वयेगु व सञ्चारमाध्यमय् प्रतिक्रिया बिइगु बाहेक थज्याःगु खँय् सुं सतकय् मवः । बरु संविधानय् मांम्हस्या नामं मस्तय्त नागरिकता बिइमाःगु खँय् धाःसा सडक क्वानाच्वन । थ्व गज्याःगु विडम्बना, मिस्तय्त हिंसा जुयाच्वन धकाः अध्ययन, अनुसन्धान, प्रपोजल व रिपोर्ट च्वइपिं अले जुलुस, सभा, सेमिनार याइपिन्सं थःगु उपस्थिति तकं हरि पराजुली काण्डय् क्यनेमखन । अले मन्त्री नं राजिनमा बिइवं मिसा अधिकारवादीतय्सं जिमिसं आन्दोलन यानागुलिं मन्त्री राजिनामा बिइत बाध्य जुल धकाः छु ख्वालं धायेगु?

तर । सञ्चार व सामाजिक माध्यमं व व मिसा अधिकारवादीतय्सं जिमिसं यानाः थथे जूगु धकाः किसिन्हाय् छुइमखंनि बलय् थ्व घटनां मेगु रुप काल जब मुलपानीया जनतां व मन्त्री पराजुली पाखें अमर्यादित व्यवहार फयाः, ल्हाः पालाः ब्वह बिउम्हस्यां थः मन्त्री पाखें छुं बांमलाःगु मजू, सञ्चार माध्यम पाखें जूगु धकाः पत्रकार सम्मेलन हे यानाः थःगु सार्वजनिक अभिव्यक्ति बिल । उमिसं धाल, मन्त्रीं मखु, मिडियां महिला हिंसा यात <http://www.ekantipur.com/2015/07/03/capital/woman-says-minister-was-not-... । वं ला पराजुलीं अथे दुव्र्यवहार मयाः वं आशिर्वाद काःवःगु जक धाल । थुकिं भिडिओय् व किपाय् प्रत्यक्ष खंगु खँयात तकं चुनौती बिउगु दु । वयात ला मन्त्रीनं थःगु शरीरय् मयः मयः घय्पूवःगु स्वयाः थःगु किपा सञ्चारय् वयाः हिंसा जूगु तायेकल ।

खः उगु घटनाय् मिसाया ख्वाःपाः बुलुकाः जक किपा बिइमाःगु धइगु आचारसंहिता दु, गुगु यक्वस्यां पालना याःसां गुलिगुलिस्यां पालना मयाःगु खनेदत । तर मयाःसा जिउगु आचारसंहिता पालना मयाः धयागु नामय् मयासे मगाःगु कानून पालना मयाःम्ह मन्त्रीयात मुक्ति वा क्षमादान बिइगु ज्या गुगु अप्रत्याशित कथं मुलपानीया जनतां यात थ्व तसकं अर्थपूर्ण जुल । थुकिं थःगु, थः नेतायागु व थःगु पार्टीया बेइज्जत जूगु खनाः हिमही चानाच्वंपिं पार्टीप्रति बफादार कार्यकर्ताताय्त मडियायात तथानाम ब्वह बिइगु छगू ह्वताः ला सुनियोजित कथं हे दयेकाबिल तर थुकिया दूरगामी लिच्वःया बारे सुं बांलाक चिन्तित जूथें मताः ।

छम्हनिम्हस्यां पाठक प्रतिक्रियाया रुपय् सां थ्व गलत खः धकाः खँ ला पितहल <http://setopati.com/pathak-bichar/30308/> तर मिडियाया पक्षय् सुनां नं नवानामबिउ थें खनेदत । खः वयागु फोटो कायेत अले सञ्चारय् तयेत वयागु अनुमति मकाःगु हे खत । तर सार्वजनिक थासय् वयागु फोटो, व नं वयागु हे भासं बांमलाःगु छुं मजूगु घटनाया फोटो प्रकाशित जुयाः वयात पत्रकार सम्मेलन हे यायेमायेक घाःलाःगु जुयाच्वन । हलू धासेंलि कुतिं न्यायेम्वाः । नेपाःया सामान्य जनजीवन राजनीतिं गुलित असर लाकाच्वनी अले सत्ताय् थ्यंपिं खनाः ग्यानाः व निगः प्यंगः ध्यबाया लोभय् बलात्कार तकया बयान ला लितकाइ धासेंलि थ्व छुं मखु । तर न महिला अधिकारकर्मीया न संचार माध्यमया धारणा पिहाँ वल ।

थ्व हरि पराजुली काण्डं छम्ह मन्त्री पद वन । तर न मिडिया त्यात, न मिसा अधिकारवादी त्यात न पिडितयात हे न्याय जूगु जुल । गज्याःगु नागरिक समाजय् झी म्वानाच्वना, गन सुं हे सुं प्रति जिम्मेवार जुइमखु । थः कतिलाःगु खँ जक ल्हानाः समाज बनेजुइमखु, थज्याःगु हे समाजया हलू पहलं हे अधिनायकवादीतय्सं छ्यं ल्ह्वनीगु खः, झीत झी यस्सें दास याइगु खः, थ्व खः इलय् हे वाः चायेकेफुसा झीगु भविष्य थ्व गबलें ल्याय्म्ह मजुइगु प्रजातन्त्रय् सुरक्षित जुयाच्वनी, मखुसा धायेमफु ।

- See more at: http://www.newaonlinenews.com/%E0%A4%B9%E0%A4%B0%E0%A4%BF-%E0%A4%AA%E0%A4%B0%E0%A4%BE%E0%A4%9C%E0%A5%81%E0%A4%B2%E0%A5%80-%E0%A4%AE%E0%A4%BF%E0%A4%B8%E0%A4%BE-%E0%A4%85%E0%A4%A7%E0%A4%BF%E0%A4%95%E0%A4%BE%E0%A4%B0-%E0%A4%B5-%E0%A4%B8%E0%A4%BE%E0%A4%AE%E0%A4%BE%E0%A4%9C%E0%A4%BF%E0%A4%95-%E0%A4%AE%E0%A4%BF%E0%A4%A1%E0%A4%BF%E0%A4%AF%E0%A4%BE#sthash.DbMUZOxQ.dpuf