Tuesday, March 8, 2016

20160308 नियात्राया भूमिका बारे

सम्पादकजु,
कवि व भाषा आन्दोलनकारी डा. पुष्पराज राजकर्णिकारजुया न्हूगु नियात्रा सफू “जिगु निक्वःगु अमेरिका भ्रमण व स्वानावंगु खँ” पिदन । वय्कःयात यक्व भिंतुना ।

सफू ल्हातिइ लायेवं उकिया भूमिकाय् मिखा वन । थः साहित्यया विद्यार्थी, छकः निकः सःसःथे नियात्रा धकाः नं च्वयाच्वनाम्ह अले छकः नेपालभाषा साहित्य् नियात्राया थाय् धकाः गोष्ठीइ कार्यपत्र हे ब्वयेधुनाम्ह जुयाः उकिया भूमिका ब्वनेत हथाय् चाइगु स्वाभाविक नं खत । 

उकिं उकिइ पूर्ण ताम्राकारजुं च्वयादीगु भूमिका महत्वपूर्ण जूवन जितः । वय्कलं साहित्यय् निबन्धया ब्वथला कथं छताजि निबन्ध – नियात्रा निबन्ध कथं ब्वयादीगु दु । थ्व भूमिका ब्वब्वं जितः जिं नःलि साहित्यिक पत्रिकाया ग्वसालय् २०१३.५.१८ कुन्हु जूगु विचारगोष्ठीइ न्ह्यब्वयागु (नेपालभाषा केन्द्रीय विभागया जर्नल नेपालभाषाय् २०१३.११.१० कुन्हु पिदंगु व उकिया मूति ११३५या न्हूदँया दबू नेपाः पासापुचः अमेरिकाय्या लुमन्तिपतिइ पिदंगु) कार्यपत्र लुमन । जिं छु छु लुइकागु खः व व जक वय्कलं लुइकादिल खनी । न्हूगु खँ ब्वनेमखंबलय् थः स्वयाः थकालिपिं अले सःसिउपिं समालोचकपिन्सं थःम्हं स्वयाः दुग्यंक न्हू न्हूगु खँ तयाः भूमिका च्वयाः जिमित लँ क्यनाबिइ धइगु जिमिसं आशा यायेगु अस्वभाविक मखु । 

उकिसं जिं ११३२य् कार्यपत्र न्ह्यब्वयाबलय् ११३२तकया नियात्रा धायेल्वःगु सफूया ल्याःचाः कयाः झिंस्वंगू सफूया धलः बियागु खः । आः ११३६या सिल्लाय् पिदंगु थ्व भूमिकाय् नं वय्कलं ११३२ तकया दुने नियात्रा निबन्ध सफू झिंस्वंगू जक पिदंगु दु धयादिल । वय्कलं थ्व सफूधलः सुनां नं दयेकागु ल्ह्ययाकयागु नं धयामदी । थन स्वताखँ न्ह्यःने दंवइ ः क) जिं ११३२य् धलः दयेकाबलय् (म्होतिं नं) निगू सफूया नां त्वःफिनाच्वंगु दु । उकियात वय्कलं नं त्वःफिकादीगु धकाः थुइकेमाल, मखुला ? ख) ११३२ निसें ११३६ तक, वंगु प्यदँत्याया दुने नियात्राया मेगु सफू पिहाँ मवः धयादिउगु ला? ग) वय्कःया भूमिका नं ११३२य् च्वये लिधःगु ला? 

थुलि धायेधुंकाः हलू धायेधुंकाः कुतिं न्यायेम्वाःल । च्वमिपिनिगु विशेष धर्म दइ । उकिसं थःत समालोचक धायेकेयःपिन्सं ला थ्व धर्म झन् हे त्वःफिके मजिउ । थः स्वयाः क्वकालिपिन्सं च्वयातःगु नं ज्याख्यलय् लाःगु अले त्यानाकयागु खःसा नां जक न्ह्यथनाबिउसा उमि किसिन्हाय् जुइ । थज्याःगु खँ थकालिपिन्सं लुमंकाबिइमाः ।

नेपालभाषा साहित्य ख्यलय् समालोचकपिं म्हो । सफू च्वये स्वयाः नं छम्ह समालोचकयात थःगु सफूया भूमिका च्वके थाकु । अज्याःगु अवस्थाय् समालोचक धायेकाच्वंपिन्सं थज्याःगु ज्या यानाबिलकि च्वमिपिनिगु नुगः क्वतुइगु स्वभाविक खः । समालोचकपिन्सं आः च्वक्वपाक्व धइगु धारणा त्वःतेमाल, नेपालभाषाया समालोचना ख्यः अझ जिम्मेवार जुइमाल । मखुसा समालोचना विधाय् प्रतिबन्ध तयेमाल धइगु सः वइगुयात अस्वभाविक मखु धयोमालावनी । सुभाय् ।

राजेन मानन्धर
गुसिंगाल, यल । 

No comments:

न्हू सतकयात हानं भीमफेदी थें मृत शहर यायेगु ला?

  राजेन मानन्धर निद्वःदँ पुलांगु सभ्यताया इतिहास दूगु थ्व स्वनिगःया दकलय् तःधंगु बजाः लागा थौंया न्हूसतक वा न्यूरोड खः । थी थी राजनीतिक परिव...